Jabr aur Ikhteyaar(Part-One)
Lesson Six
Q1. Kiya insaan apne kaamon main majboor hai yaa ikteyaar rakhta hai?
Ans. Garche musalmaano ka aik barda tabqa is baat ka qa’el hai insaan apne kaamon main ikhteyaar nahi rakhta balke Allah jo bhi chahta hai karta hai. Lekin yeh baat bilkul ghalat aur be bunyaad hai. Kiyon ke agar ham khud apne aap main dekhain to yeh shubha door ho jayega. Yeh nazariya insaan ke fitri taqazon ke bar khilaaf hai, insaan apni main ikhteyaar mahsoos karta hai.Ham jab kisi kaam ko anjaam dena chahte hai to khud apne ikhteyaar se anjaam dete hain aur jab jis kaam se baaz rahna chahain baaz rahte hain.
Lehaza yeh kahna ke insaan majboor hai, hamare fitri taqaon ke khilaaf hai.
Q2. Kiyon yeh log jabr ke qa’el ho gaye?
Ans. Jabr ke nazariye ke chand asbaad hain jinki wajah se kuch log is nazariye ke qa’el ho gaye:
1. Mahol ka asar: Aksar baaz logon par atraaf aur mahol ka asar hota jise daikh kar baaz log yeh sochne lagte hain ke insaan apne mahol ke majboor hai aur jaise mahol hoga waise hi uski skakhsiyat tayyar hogi.
2. Siyasi sabab: Baaz zalim Humaranon nain apne zulm ki tojeeh ke liya aur apna takht o taj bachane ke liyeh kamzor aur naadaar re’aaya ko afeem ke tor par yeh baat bata’ee ke ham agar hakim hain to hamain Allah nain hamkim banaya hai aur agar tum log hamari re’aaya ho to hamare sitam ke aage majboor ho to tumhain majboor Allah nain banaya hai. Is tarhan Zalim humarano nain apne zulm ki tojeeh ki aur apni Haqqaniyat ke sabit karne ki koshish ki.
Islam main is nazariye ka aaghaz us waqt se howa hai jab se bani umayya nain takht o taj sambhala hai. Unhon nain apni siyah kariyon par parda dalne ke liya jabr ke nazariye ko apni dhal banaya.
3. Apni khamiyon par parda: Baaz log apni khaami aur kaam chori par parda dalne ke liye majboori aur qismat ka rona ro kar apne aap ko be qosoor sabit karna chahte hain, aur eyh kahte hain ham agar naakaam howe hain to ismain mera ko’ee qosoor nahi hai balke yeh meri badqismati hai, aur main apni badqismati ke aage majboor hoon.
Yeh chand wo asbaad hain jinki wajah se insaan jabr ke nazariye ka qa’el ho jata hai.
Q3. Musalmaano main iraade aur ikhteyar se mutal-liq kitne firqe hain?
Ans. Muslmaano main is silsile main 3 firqe hain:
1. Asha’era: Yeh maktab aik tafriti maktab. Iska nazariya ye hai ki ham apne kaamon main poori tarhan majboor hai aur jo Insaan agar ko’ee kaam anjaam deta hai to wo kaam wo khud anjaam nahi de raha hai balke yeh Allah hai jo us-se wo kaam karwa raha hai.
2. Mo’tazela: Yeh maktab aik ifraati maktab hai. Iska kahna yeh hai ke insaan apne kaamon main poori tarhan mukhtaar hai aur Allah ka uske kaamon main ko’ee dakhal nahi hai. Jis tarhan Aik engine banane wala, engine bana kar bilkul engine se be rabt hota hai. Isi tarhan Allah nai bhi hamain bana diya hai aur uska hamare kamon se ko’ee rabt nahi hai, ab sirf qayamat ke din wo hamare kaamon ka mowakheza karega aur naik kaam karne walon ko jaza aur bad karon ko saza dega.
3. Amr bainal Amrain: Yeh maktab hamare Imamon ka hai. Iska matlab yeh hai ke ham na poori tarhan apne kaamon main majboor hai is tarhan ke hamare kaamon main hamara iraada be dakhal ho, aur na hi poori tarhan be mehar mukhtaar hai is tarhan ke Allah ka hamare kaamon se ko’ee rabt hi na ho. Balke ham Ikteyaar bhi rakhte hai aur kuch kaamon main naa tawan bhi hain.
Jabr-o-Ikhteyaar (Part-Two)
Lesson Seven
Q1. Nazariya-e-Jabr ka nuqsaan hai?
Ans. Agar ham insaan ko poori tarhan majboor maan lain iska matlab yeh hoga ke ab agar ko’ee gunah karta hai to wo khud nahi karta hai balke Allah us-se yeh gunah karwa raha hai. Ko’ee sharab pita hai to usne khud sharab nahi pee hai balke Allah nai use sharab peene par majboor kiya hai. Ko’ee agar kisi ka khoon karta hai to usne khud khoon nahi kiya hai balke Allah nai usko khoon karne par majboor kiya.
Aur jab insaan khud ko’ee kaam na kare to use us kaam ki saza dena be maana aur naa jayaz hai. Lehaza qayamat ke din khuda na gunahgar ko saza de sakta hai, kiyon ki yeh uske insaaf ke khilaaf hoga. Aur kisi ko jaza dena bhi bekaar hoga kiyon ki jo kaam usne khud kiya hi nahi uski jaza dena mahaz aik mazaq hoga.
Lehaza agar ham jabr yaa mukammal ikhteyaar ke qa’el ho ja’ain to jannat aur dozakh aur tamam qawaneen o usool be maana aur lagho honge.
Q2. Kiya hamare kaamo main khuda shareek hai?
Ans. Insaan jab bhi ko’ee kaam anjaam deta hai to usmain chand cheezain shamil hoti hain:
1. Insaan ka Iraada.
2. Insaan ki quwwat.
3. Insaan ka amal.
Insaan jab tak kisi kaam ka iraada na karley us ka ko anjaam hi nahi deta. Aur sirf iraada bhi kaafi nahi hai balke iraade ke hamraah quwwat ka hona bhi zaroori hai. Aur sirf quwwat aur iraada kaafi nahi hai balke, iraade aur quwwat ke baad jab tak insaan apne aa’zaa aur jawareh ko kaam main na laye us waqt tak uska iraada aur quwwat bekaar hai.
Aur insaan ka iraada, uski quwwat aur uska amal sab Allah ka hi diya howa hai. Allah nain insaan ko nain insaan ko saare raaste dikha diye, sahi kiya hai ghalat kiya hai bata diya, Usey quwwat, iraada aur kaam ke liye jism dediya. Ab insaan chahe to is quwwat, iraade aur jism ka sahi iste’maal karey aur chahe to ghalat. Lekin insaan jo bhi kaam anjaam dega Allah ki di howi quwwat se, Allah ke diye howe iraade se, Allah ke diye howe jism se.
Lehaza agar Allah hamare kaamon main sharik hai to is maana main ke insaan ke paas jo kuch bhi hai wo Allah ka diya howa hai. Insaan jo kaam bhi anjaam deta hai Allah ki di howi cheezon ko iste’maal main lakar hi anjaam deta hai.
Q3. Kiya Allah hame gumrah karta hai?
Ans. Hargiz nahi, Allah nain hame neki aur bura’ee kiya bata diya aur hamain iraada aur ikhteyaar bhi diya, hamian quwwat o taqat bhi. Ab agar insaan us ke bata’ey howe sahi raaste par chale aur uski farma bardaari kare to wo kamyaab hoga aur dunya aur aakherat main kaamyaabi payega. Aur insaan Allah ki raah main aik qadam bardha’eyga to Allah kaayaabi ke raaste mazeed uske liye hamwaar kardega.
Lekin is ke barkhilaf, agar ko’ee bura’ee ke raaste par chale aur khuda ki naa farmani kare to khuda use uske haal par chord deta hai. Bilkul usi tarhan jaise ko’ee shakhs agar sahi raaste se bhatak jaye to jitna ziyada tez chalega apni manzil se door hota jayega, aur phir aik waqt aisa aataa hai ke wo insaan halakat ke darre main phans jaata hai. Lekin yeh insaan agar is haalat ko pohncha hai to khud apni wajah se use kisi zabar dasti is manil tak nahi pohnchaya hai.
Isi tarhan Allah bhi us insaan ko uske haal par chord deta hai jo uski naafarmaani karta hai. Aur usey Hidayat ke chiragh nahi dikhata, jiski wajah se insaan gumraahi ke bhawanr main phansne lagta hai. Lekin Is natije tak wo khud apne aap pohncha hai, agar wo Allah ke bata’ey howe raaste par chalta to yaqeenan Allah ki rahmat aur hidayat ka mustahaq hota.
Lehaza Allah ka gumraah karna uska hamain hamaare haal par chord dena.
Q4. Agar Allah adil hai to chand lamhon ke gunahon ke liye Jahannam main hamesha ke liye kiyon dalega?
Ans. Kabhi kabhi insaan gunah bohot mukhtasar se waqt main anjaam deta hai lekin uska asar zindagi bhar ya phir chand naslon tak ka hota hai, jaise kisi nain kisi ko goli mark kar khatam kardiya. Garche yeh kaam bohot mukhtasar se waqt main howa hai lekin, iska asar bohot barda hai, iske sabab poori aik zindagi tabah hoga’ee.
Yaa phir aik lamhe main anjaam diya howa kaam sakrdo naslon aur insaanon ki tabhi ka sabab banta hai. Jaise America na Heroshima par Atam Bomb giraya tha. Garche wo kaam chand minutes ka tha lekin is aik dhamaake nain kitne insaanon ki jaan leli, naslon ko tabah kiya, poora mulk barbaad hogaya. To gunah to bohot mukhtasar waqt ka tha lekin uska nuqsaan bohot barda howa. Lehaza qiyamat ke din waqt ke e’tebar se saza nahi di jayegi balke gunah ki ahmiy ke e’tebar se saza milegi, jiska gunah jaisa hoga waisi hi saza milegi.
