Ma’aad (Part One)
Lesson Fourteen
Q1. Ma’aad kise kahte hain?
Ans. Dunya ke khateme ke baad khuda wand-e-Aalam Adam se Khatam tak ke saare insaanon ke dobaara zinda karega take logon ka hisaab-o-kitaab kare aur phir naik aur saleh afraad ko jaza aur badkaar-o-gunahgaaron ke saza dega. Logon ke is jama’ karne aur unke hisaab-o-kitaab karne ko “Ma’aad” kahte hain.
Q2. Kiya mot zindagi ke khateme ka naam hai?
Ans. Hargiz nahi, mot zindagi ke khateme nahi balke aik na’ee aur abadi zindagi ke aaghaaz ka naam hai. Aur agar mot par zindagi ka khatema hota to badkaar aur naik-o-saleh afraad hargiz mot ke waqt roya nahi karte.
Q3. Log mot ke waqt kiyon girya karte hain?
Ans. Mot ke waqt do tarha ke log girya karte hain:
1. Dunya parast aur Ghair-momin afraad: Yeh log is liye mot ke waqt rote hain kiyon ki marne se dunya ki raa’naa’eeyaan in se chin jaati han aur jo kuch dunya main hasil kiya hai wo sab joon ta toon dunya main rahe jaa raha hai aur wo khaali haat is dunya se jaa rahe hai.
2. Momin aur khuda parast afraad:
Teen tarha momin aur khuda parast afraad jo mot ke waqt girya karte hain:
1. Gunahgaar aur badkaar afraad: Mot ke waqt sab zindagi bhar ka aamaal naamah apni nigahon ke saamnain ghoomta daikhte hain to apni siyah kariyon ko daikh kar rote hain ke dunya ke be-amal aur khaali haat jaa rahe hain. Iinke aansoo bhi afsoos ke hote hain.
2. Wo momeneen jinke a’amaal kam hain: Wo is khof se aansoo bhai’ainge ke aiy kaash ham aur zinda rah lete taake apne a’amaal main izaafa kar lete. Inke aansoon bhi afsoos ke honge.
3. Khuda naik aur khaas bande: Yeh is liye rote hain ki ab insey bandagi ka sharaf choot raha hai, lekin unhain is baat ka shoq bhi rahta hai ki wo apne parwardegaar ki baargah main mulaqaat ko jaa rahe hain. Inke aansoo ishq aur shoq-e-mulaaqaat-e-khuda ke hote hain.
Chunaanche wo log jo dunya se juda’ee ke aansoo bahate hain unhain mot ke waqt ahsaas hote hai ki wo jis dunya se juda hone ke liye aansoo baha rahe hain, dunya wahin par khatm nahi hoti hai balke iske baad bhi abhi aik azeem dunya baaqi hai, jahan ke liye yeh log abhi tayyar nahi hain. Lehaaza yeh kahna ke mot zindagi ka khatema hai, bilkul ghalat hai, balke mot ke baad bhi aik zindagi jise aakherat kahte hain aur mot uska muqaddama hai.
Q4. Qayamat ka qayam hona kiyon zaroori hai?
Ans. Jis tarha insaan ki fitrat main dunya ke khateme se pahle aik ilaahi masihe aur munji-e-bashariyat ki zaroorat hai taake, bad kaaron ko unke zulm-o-sitam aur gunahon ki saza dunya main dee jaa sak, isi tarha insaan ka fitri taqaza hai ki wo log dunya main zulm-o-sitam ki tareekh bana’ee hai aur be-inteha logon par sitam kiye hain aur uske baad is dunya se mar kar chale gaye hain. Aise logon ko kaifar-e-kaar tak pohonchna chahiye aur unhain unke jurm ki saza milni chahiye, wagarna Khuda ke adl-o-insaaf par sawaaliya nishaan lag jaa’eyga. Kiyon ki agar Imam-e-Zamaana ka zohoor zaalimon ko saza dene ke liye zaroori hai, isi tarha qayamat ka qayam hona bhi zaroori hai, kiyon Imam ke zariya zaalimon ko sirf is dunya main saza milegi aur aik baar milegi, lekin bohot se mujrim aise honge jinka jurm be-shomar aur uski saza bhi be-shomar hogi, lekin agar unhain aik baar mot ki saza dedi jaaye, bohot se jara’em be-saza rah jaa-ainge. Lehaaza ko’ee aisa adliya hona chahiye jismain be-inteha zulm karne waalon ko be-inteha saza di jaasake.
Lehaaza qayamat ka qayam hona fitri tor par zaroori hai.
Q5. Qayamat par Iman insaan ki zindagi main kiya asar rakhta hai?
Ans. Agar logon ko yeh ehsaas hojaye ke, dunya ki adalat se bardi aur aham aik adalat mojood hai, ke jahan faisla sirf haq aur insaaf waala hoga aur wahan ke faisel main na-ko’ee khata hogi aur na-ko’ee bhool, aur saari dunya se jurm chip jaye lekin us adalat se chipne waalaa nahi, aur yahan agar gawah jhooti gawahi dekar jurm ko chipa dain, lekin us adalat main jhooti gawahi ka ko’ee sawaal hi nahi ho sakta, kiyon ki wahan jo qaazi hai wo hai gawah hai. Neez us adalat main khud insaan se ke aa’maal gawahi dainge aur wahan insaan ki zabaan band kardi jaa’eygi aur uske a’azaa aur jawareh uske jurm ke khilaaf gawahi dainge.
Chunaanche jab insaan ko aisi adalat ka ahsaad ho jaye to yaqeenan jurm karne se qabl hazaar baar sonchega. Aur yeh ehsaas mo’aashre se jurm kam karne main behtareen madadgaar hoga, iske saath hi saath insaani mo’aashere main amn-o-sokoon ke phailne main behtareen mo’aawin hoga.
Q6. Qayamat ke din kis tarha logon ko marne ke baad zinda kiya jayega?
Ans. Mot ke baad dobaara zinda karne ka sawaal ko’ee naya sawaal nahi hai balke yeh wo sawaal hai jo taqreeban tamam Ambiya se kiya jaata tha ke hamre marne ke baad khuda kaise hamain do baaraa zinda karega:
Lekin khuda wand-e-Aalam nain is ka behtareen jawaab diya, wo yeh ki: Aiy rasool inse kahdije jis khuda nain inhain pahle khalq kiya hai wo hi inhain dobaara zinda karega. Yaani pahli baar jab ke ko’ee namoona ya nazeer na-thi Allah nain unhain khalq kiya to ab jab inki khilqat ho chuki hai uske liye ko’ee mushkil amr nahi hai.
Is ke alaawa hamari zindagi main qayamat aur ma’aad ki be-shomar nazeerain mojood hain:
1. Chunaanche har saal darakhton ka murda hone ke baad dobaara zindagi paana.
2. Banjar zameen ka zar khaiz hona.
Q7. Kiya insaan qayamat ke baghair zinda rah sakta hai?
Ans. Insaan ke andar kuch aisi khahishain paa’ee jaatee hain jo hargiz is mahdood aur fana hone waali dunya main hasil hone waali nahi hain. Chunaanche un main se 2 jo sab se aham hain wo mandarja zail surat main hain:
1. Hamesha zinda rahne ki khahish
2. Insaan ke andar na-tamam khahishain jinka tanha jawaab abadi zindagi aur qayamat ki ne’matain hain.
Ma’aad (Part Two)
Lesson Fifteen
Q1. Kiya ma’aad roohaani hai yaa jismani hai?
Ans. Baz logon ka khayal yeh hai ke qayam ke din Khuda sirf ruhon ko hashr karega, aur jism ki ma’aad nahi hogi. Quran aur hadeeson main be-shomaar takeedain mojood hai is baat par ke ma’aad jismani aur ruhaani dono hai. Misal ke tor par sura’e yaaseen main khuda irshaad farmaata hai:
“Tum log qayamat ke din apni qabron se nikalain ja’oge”
(Sura’e Yaseen/ 51)
Wazeh si baat hai ki qabr se ruhon ko nahi nikaala jayega, kiyon ke ruhain qabron main dafan nahi ki jaati hain, qabr main jism utaara jaata hai. Ruh aalam-e-barzakh main qayamat tak ke liye mo’allaq hojati hai.
Q2. Qayamat main kis tarha jismon ko mahshoor kiya jayega?
Ans. Aaj Science nain is baat ko sabit kardiya hai ki har insaan ke jism ke cells har saat (7) saal main badalte hain, aur saat saal ke baad insaan ke jism ke puraane cells khatm hojate hain aur unki jagah na’ee cells aajaate hain. Aisi surat main khuda aakhri jism ke saath logon ko hashr karega. Doosri sab se aham baat yeh hai ki insaan ka jism badla hai, lekin uski ruh aur uski haqeeqat aur uska zaati tashakh-khus apni jagah joon ka toon baaqi hai. Lehaaza chahe cells badal ja’ain lekin insaan ki haqeeqat nahi badalti, aur khuda aakhri jism ke saath insaanon ko isliye mahshoor karega, kiyon unki haqeeqat wahi hai jo pahle thee, aise nahi hai ki cells ke badalne ke saat wo insaan bhi badal gaya hai.
Ya phir zameen main jab insaan ko dafn kiya jaata hai to kuch dino ke baad wo zameen ka hissa ban jaata hai aur phir wo dobaara khaad ban kar darakhton ka juz ban jaata hai aur phir ussey phal wojood main aate hain aur phir insaan usey khaata hai. Aur phir wo cheez uske jism ka hissa ban jaati hai. Is tarh doosre insaan ke jism ke aazaa us insaan ke jisma main mil jaate hain. To ab agar khuda qayamat ke din hisaab-o-kitaab ke baad saza ya jaza dega to har insaan ke jism ke a’azaa ko uske asli malik ke jism main palta’eyga aur phir saza ya jaza dega, taake poori tarha adl-o-insaaf ho sakey.
Q3. Agar qayamat ke din har insaan ko uske badan ke ajzaa ke saath mahshoor kiay jayega to baaz logon ka badan naqis rah sakta hai, to kiya khuda naqis badan ke baaz logon ko mahshoor kaurega?
Ans. Is khuda roz mahshar har ko kamil jism aur badan ke saath mahshoor karega aur doosre insaanon ke jism ke aazaa nikaalne ke baad agar jism naqis rah bhi jaata hai to khuda unhain apni qudrat se kamil kardega.
Q4. Barzakh kise kahte hain?
Ans. Mot ke baad qayamat se pahle tak ke zamaane ko barzakh ka zamaana kaha jaata hai.
Q5. Qayamat ke din achcha’iyon aur bura’iyob ki gawahi kon dega?
Ans. Qayamat ke din insaan ke a’amaal uske haq main ya phir uske khilaaf gawahi dainge. Na sirf a’amaal balke uske aa’zaa wo jawareh uske khilaaf gawahi dainge. Khuda wand-e-Aalam Quran-e-Majeed main irshaad farmaate hai:
“Al-Yoma nakhtemo a’laa afwaahe-him, wa tukallemona, aideehim wa arjolahum, bemaa kaanu yakseboon”
(Sura’ey Yaseen/ 65)
‘aaj main unki zabaanain band kardoonga, aur unke haat aur pair unke a’amaal ki gawaahi dainge’
Yaa phir aik doosre maqaam par khuda ahl-e-jahanam ki zabaani hikayat karta hai:
“Qaaloo le joloode-him, lemaa shahidtum alainaa, Qaloo antaqanallahol Lazee antaqa kulla shai’in”
(Sura’e Fusselat/ 21)
‘ wo apne jism ke chamrdo se kahainge, kiyon tum nain hamare khilaaf gawaahi di, to jims ki chamrdiyaan jawaab daingi, wo khuda ke jisne har cheez ko bolne ki salahiyat ata ki hai, usney hamain zaban di (taaki ham haq go’ee karain)’
Is aayat se yeh waazeh hota hai kin a sirf insaan ke haat pair balki uske jism ke chamrde bhi uske khilaaf haq go’ee karainge aur gawaahi dainge.
Yaa phir baaz aayaat ke mutabiq khuda insaan ke gunah uske saamne hazir ho ja’ainge, jiske baad phir insaan ke paas jhutlaane ki ko’ee gunja’ish baaqi nahi rahegi.
Q6. Qayamat ke din gunah ki tarha insaan ke saamne hazir honge?
Ans. Aayaat aur riwaayaat ke mutabiq roz-e-qayamat insaan ke saamne uske a’amaal mujassam shakl main zahir honge. Misal ke tor:
“wo log jo sood khoor hain, qayamat ke din us bimaar ki tarha mahshoor kiye ja’ainge jiska jism itna kamzor hoga wo kabhi zameen par gira aur kabhi uthega”
(Sura’e Baqarah/ 27)
“Wo log jo mohtakir hain, bakheel hain, yaa zar-andozi karte hain aur doosra ka haq ada nahi karte hain, aise logon ki gardan par aik waznee toq daala ja’eyga, jiske wazan se un main apni jagah se hil ka taab nahi rahega”
(Aal-e-‘Imraan / 180)
Yaa doosre maqaam irshaad hota hai:
“Wa wajadoo maa amaloo haazeran”
‘Logon nain jo kuch bhi anjaam diya hai, wahan hazir paa’ainge’
(Sura’ey Kahaf/ 49)
Yaa phir sura’ey zilzaal main irshaad hota hai:
“Yao ma’ezin yasdorun-naas ash-taatan le-u’ro a’amaalahum, Fa-maiyn yaa’mal misqaala zarratin khairaiyn yaraho wa maiyn yaa’mal zarratin khairaiyn yaraho”
‘us din log garoh dar garoh nikalainge, to goya jisne zarra barabar bhi ko’ee naiki ki hogi wo usey dekhega aur jisne zarra barabar bhi ko’ee badi ki hogi wo usey dekhega’.
Yaa phir hadees main Rasool-e-khuda irshaad farmate hain:
“Az-zulm howaz zolomaat yaomal qiyaamate”
‘zulm-o-sitam qayamat ke din taareeki ki shakl main zahir honge’
Yaa phir baaz hadeeson ke mutabiq insaanon ke naik aa’maal aik khoobsurat insaan ki shakl main zahir honge aur uske bure aa’maal aik badrooh aur bureh insaan ki shakl main zahir honge.
In tamaam aayaat aur is tarha ki hadeeson se yeh baat wazeh hoti hai ki qayamat ke din insaan ke tamam a’amaal mujassam hokar uski aankhon ke saamne rakh diye jaa’ainge.
Baargaahe khuda main dua hai ki khuda dunya main hamaari kotahiyon ko maaf farmaa’ey aur roz-e-mahshar ki ruswaa’iyon se mahfooz rakhe. (Aameen)
