Khatemiyat aur Imamat
Lesson Eleven
Q1. Kiya Quran ke baad aur ko’ee doosri kitab Allah ki janib se Insaano ki hidayat ke liya aanaa zaroori hai?
Ans. Allah nain Nabiyon aur Aasmaani kitabon ka silsila is liye jaari kiya tha ke wo insaano ki hidayat karain aur unki fikri satah ko is had tak pohncha dain ke wo Quran jaisi azeemul martabat kitab aur Islam jaise deen ko samajhne ke qabil ho ja’ain. Aur jab logon main fikri e’tebaar se yeh salahiyat aa ga’ee ke wo Quran-e-Majeed ki Aayaat-o-Ahkaam ko kuch had samajh sakain, aur Islam jaise azeem mazhab ke haqa’eq ko samajh sakain to Allah nain anbiya ka silsila mutawaqqif kardiya. Aur ab iske baad kisi aur Ilaahi shari’at ki zaroorat nahi hai. Islam ta qayam-e-qayamat logon ki hidayat ke liye kaafi hoga. Lehaza Allah nain Rasoolon ka silsila mutawaqqif kar diya. Lehaza ab na Islam ke baad ko’ee shari’at aayegi aur na Rasool-e-Akram ke baad ko’ee nabi ya Rasool.
Q2. Silsila’ey nobowwat ke khatm hone ko istelah main kiya kahte hain?
Ans. Istelah main is silsile ke khatm hone ke Khatemiyat kahte hain.
Q3. Khatemiyat kiyon ho’ee?
Ans. Ambiya ke silsile ka raaz yeh tha ke logon ki fikri satah ko rush-o-nomoo hasil ho. Lehaaza jab Allah nain hidayat ke us aakhri silsile aur aakhri kitab ko nazil kar diya, jis main abadi sa’aadat aur taraqqi mojood hai, aur jo aik mukammal qanoon aur aa’een-e-Hayat hai, Allah nain Nabiyon ke silsile ko rok diya aur. Nabi-e-Akram ko khatimul Ambiya bana kar bheja.
Q4. Khatemiyat ke kiya maa’na hain?
Ans. Khatemiyat “Khat” se bana hai, Is ka maa’na hai “mohr lagana”, aur angoothi ko khatam bhi kahte hain kiyon ke pahle zamane main badshah apne khat ke aakhir main apni angoothi ke zariya mohr lagate the.
Q5. Khatemiyat ke silsile main Quran kiya kahta hai?
Ans. Khuda wande Aalam Quran majeed ke sura’ey Ahzaab ki 40 aayat main irshaad farmaata hai:
ما کان محمد ابا احد من رجالکم و لٰکن رسول اللہ و خاتمَ النبیّین
“Mohammad tum mardon main se kisi ke bhi baap nahi hain, lekin wo rasool-e-Khuda hain aur khatam-e-Ambiya hain”
Is aayat se saaf wazeh hota hai ki Rasool-e-khuda ke baad aur ko’ee doosra nabi nahi aa’eyga.
Q6. Hadison main khatamiyat ke baare main kiya bayan hai?
Ans. Beshumaar hadisain hain jin main Rasool ke aakhri nabi hone ka tazkira aayaa hai. Chunaanche Khud jang-e-Tabook main jab Rasool khuda Hazrat Ali ko Madine main ma’mool ke khilaaf chord kar gaye, to Madine main mojood munafiqon nain Hazrat ko taa’na dena shoroo’ kiya to Hazrat Ali (a.s) Rasool ki khidmat main pohnche aur Rasool ki bargah main shikaayat ki to Aapne farmaaya:
“اما ترضیٰ ان تکون منّی بمنزلة ھارون من موسیٰ الّا انّہ لا نبیَّ بعدی۔ ”
“Aiy Ali kiya tumhe yeh manzoor nahi ke tumko mujhse wahi nisbat ho jo Haroon ko Musa se thee”
Is hadees sey saaf wazeh hota hai ki Anhazrat ke baad ko’ee aur nabi aane waala nahi hai.
Isi tarha Imam-e-Sadiq (a.s) farmaate hain:
“حلال محمد حلال ابداً الیٰ یوم القیامة و حرامہ حرام ابداً الیٰ یوم القیامة”
Halal-e-Mohammad, halal rahega hamesha qayamat tak ke liye, aur Haram-e-Mohammad, Haram rahega hamesha qayamat tak liye.
Is hadees main bhi saaf-saaf waazhe hai ki Rasool-e-Khuda ke baad ko’ee doosri shari’at aane waali nahi hai.
Q7. Agar Risaalat ka silsila khatm hojaye to musalmaano ki zindagi main pesh aane waale jadeed aur naye masa’el ka hal kaise nikaalaa jayega?
Ans. Allah nain Quran aur Ahadees main aise usool aur qawaneen bayan farmaadiye hain, jin main zindagi main pesh aane waale tamam masa’el ka jawaab mojood hai.
Q8. Agar Rasoolon ka silsila khatm hojaye to dushmano ke shar se deen ko kon bacha’eyga?
Ans. Allah agar nobowwat ka silsila khatm kardiya to bilkul deen ko laawaaris nahi chord diya balke risaalat ke baad Allah nain deen ki muhafezat ka doosra silsila jaari kiya jise “Imamat” kahte hain. Yeh mansab har e’tebaar se wahi shaan rakhta hai jo shaan-e-Risaalat hai, bas farq yeh hai ke Rasool par wahi nazil hoti hai aur rasool-o-nabi sahib-e-shari’at hota hai, lekin Imam na sahib-e-shari’at hota hai aur na hi us par wahi nazil hoti hai.
Q9. Risaalat ke baad Imamat kiyon zaroori hai?
Ans. Rasool-e-Khuda ko Allah nain teen aham ohde diye the:
1. Allah ke qawaaneen ko wahi ke zariye hasil karna aur logon tak pohnchana.
2. Logon ki deeni aur akhlaaqi hidayat karna.
3. Logon ke darmiyaan Ilaahi qawaaneen ka nefaaz aur logon ke darmiyaan qayadat, Imamat aur Hokumat ke fara’ez ko anjaam dena.
Chunaanche in teenon ohdon main se risaalat ke silsile ke khatm hone ke baad sirf Allah ke qanoon ko wahi ke zariye hasil karke logon tak pohnchaane ki zaroorat khatm hojaati hai, kiyon ki Aap nain tamam ahkaam aur Shari’at-e-Khuda ko pohncha diya. Lehaaza ab wahi aur shari’at ke pohnchaane ki zaroorat khatm hoga’ee, lekin logon ke darmiyaan ilaahi qawaaneen ka nefaaz, unka tahaffuz aur unke darmiyaan qayadat aur Hokumat neez logoon ki akhlaaqi hidayat ki zaroorat baaqi rahti hai. Lehaaza risaalat ke silsile ke khatm hone ke baad kisi aisi Ilaahi nomayande ki zaroorat rahti baaqi rahti hai jo har e’tebaar se Rasool ki sifaat rakhta ho sirf uspar wahi nazil na hoti hai.
Doosri sab se ahem baat yeh hai agar ko’ee Ilaahi mansabdaar na ho to zameen-e-Khuda, Hujjat-e-Khuda se khaali ho ja’eygi, jab ke ahadees main is baat taakeed ho’ee hai ke zameen aik lamhey ke liye bhi Hujjat-e-khuda se khaali nahi rahegi. To Rasool ke baad aik ilaahi noma’inde ka hona zaroori hai taake zameen par Hujjat-e-Khuda baqi rahe.
Lehaaza risaalat ke baad Imamat zaroori hai.
Q10. Imamat ke mas’ala main musalmaanon main kitne firqe hain?
Ans. Imamat ke silsile main musalmaan do barde garoh main bate howe hain:
1. Shia jinka kahna hai ki risaalat ke maanind Imamat bhi aik ilaahi ohda hai aur Imamat bhi Khuda hi deta hai.
2. Ahl-e-Sunnat jinka kahna hai ki khuda ki taraf se sirf Rasool mo’ayyan kiya jaata hai, Imamat ohda musalmaano ke aapsi ittefaaq ke zariye kisi ko milta hai. Aur Imam main Rasool jaise osaaf ka hona zaroori nahi hai.
Imamat (Part Two)
Lesson Twelve
Q1. Imam ke fara’ez kiya hain?
Ans. Imam ke fara’ez kuch is tarha hain:
1. Logon ki akhlaaqi aur maanawi hidayat karna, jis tarha Rasool-e-khuda hidayat farmaate the.
2. Ilaahi shari’at ki Hifazat aur paasdaari karna.
3. Ummat ki Siyasi aur ijtemaa’ee qayadat karna.
4. Logon par Allah ki taraf se Itmaam-e-Hujjat hona.
5. Allah aur uske bandon ke darmiyaan faiz aur barkat ka zariya aur waasta banna, jaisa ke Rasool-e-Khuda ka wojood-e-pur faiz waasta tha.
Q2.Imam ke kiya shara’it hain?
Ans. Imam main un tamam shara’it ka paayaa jaana zaroori hai jo aik Rasool main howa karti hain aur wo shara’it kuch is tarha hain:
1. Maasoom hona.
2. Ilaahi ilm se bahramand hona.
3. Shuja’at.
4. Johd-o-Parhaizgaari.
5. Khulq-e-Hasan ka maalik ho.
Q3. Imam ya Nabi ka maasoom hona kiyon zaroori hai?
Ans. Noboowat ya Imamat dar Haqeeqat bandon ke liye aik Ilaahi lutf aur inaayat hai. Kiyon Nabi ya Imam ka fariza yeh hain ke Khuda ki janib se paigham lekar baghair kisi khata, bhool aur ghalati ke, logon tak pohncha’ey. Chunaanche agar wo paigham-e-Khuda ko logon tak pohnchaane main ghalati ya khata karega to Allah ka risaalat aur imamat ka maqsad fot hoga aur Hidayat ka fariza adaa naho ho pa’eyga. Lehaaza Nabi aur Imam ka maasoom hona zaroori hai, taake khuda hadaf aur maqsad hasil ho sakey.
Q4. Imamat Allah deta hai yaa log Imam bana sakte hain?
Ans. Imamat aik Ilaahi ohda hai aur Allah Khuda jisko Is ohde ke la’eq samajhta hai use deta. Logon ko Ikteyaar nahi hai ke kisi ko apna maasoom Imam maanlain.
Q5. Kiya Rasool nain Apne baad kisi ko Apna Jaanasheen aur Imam banaya hai yaa nahi?
Ans. Haan, Rasool-e-Khuda nain Allah ke Hukm se Apne ke liye logon ke darmiyaan Hazrat Ali ko Apna jaanasheen moqarrar kiya hai. Chunaanche 10 hijri ko Rasool-e-Khuda jab aakhri Haj ke baad waapas ho rahe the, maqaam-e-Johfa par jab pohnche to Allah ki taraf se Janab-e-Jibra’eel nazil howe aur sura’ey Maa’eda ki 67 aayat paighambar ki khidmat main pohnchaa’ee, jis main irshaad-e-parwadigaar hota:
“ Yaa ayyohar rasoolo balligh maa unzela ilaika min rabbeka, wa in lam taf’al famaa ballaghta risaalatho, wallaho yaa’semoka minan naas, innallaha laa yahdi qomaz zaalemeen”
“aiy rasool pohncha dige us paighaam ko jo Allah nain aap naazil kiya hai, aur agar yeh kaam na kiya to goya ko’ee kaar-e-risaalat hi anjaam na diya, aur Allah aap ko logon ke shar se mahfooz rakhe, aur be-shak Allah zaalimon ki hidayat nahi karega.”
Is aayat ke baad rasool-e-khuda nain aik toolaani khutba diya aur phir Hazrat Ali ko Apne haathon par buland kiya aur logon se kaha
“Man kunto maolaaho fa-haza Aliyun Maolaaho”
‘Main jiska maolaa hoon yeh Ali bhi uske maolaa hain’
Aur phir teen din tak us jalte howe registaan main qayaam kiya aur logon ko hukm diya ke wo Hazrat Ali ke haath bai’at karian aur unhain mubarkbaad pesh karain.
Q6.Hadees main ‘mola’ ke kiya maa’na hain?
Ans. Ahle loghat nain gar che ‘mola’ muta’adid maa’na bayaan kiye hain, aur loghat main yeh ka’ee maa’non main iste’maal howa hai, jaise : Dost, Ghula, saathi, sarparast, rahbar aur qa’ed. Lekin in tamaam maa’non main Rasool(s.a.w) nain sarparast, rahbar aur qa’ed ke maa’na main iste’maal kiya hai. Kiyon ke Rasool-e-Khuda na to logon ke ghulaam the, aur na to logon ke dost the balke wo sabke maalik sarparast aur qa’ed-o-rahbar the. Aur Rasool ke farmaan ke mutabiq wo jis ke bhi mo’la hain Ali uske mo’la hain. Jis maa’na main Rasool ke liye iste’maal howa usi maa’na main Hazrat Ali ke liye bhi iste’maal howa. Lehaaza ahle sunnat hazraat ka daa’wa ghalat hai ki is Hadees main ‘mola’ Imam aur qa’ed ke maa’na main nahi hai balki dost ke maa’na main iste’maal howa hai. Kiyon dost ke maa’na main us waqt dorust hota jab dono man aik hi maa’na main iste’maal hota, jab ki Hadees ke pahle hisse main rasool ke liye iste’maal howa hai aur AanHazrat hargiz logon ke dost nahi hain balki wo logon ke waali-o-waaris aur sarparast hain. lehaaza yeh baat bilkul ghalat hai ke rasool-e-khuda itna ehtemaam sirf Hazrat Ali dosti ke e’laan ke liya kiya tha aur teen dinon tak logon se dosti ka haath milwaate rahe naaki Imamat aur wilaayat ka.
Doorsi sab se aham aur qaabil-e-ghor baat yeh hai ki aayat ka lahen itna shadeed hai ke ussey maamooli si dosti samajhna aik ghair maaqool baat hogi, jab ke rasool-e-khuda Madine main aane ke foran baad musalmaanon main bhai charge aur otoofat-o-mohabbat ka ilaahi paigham pohncha chuke the. Aur Rasool ko logon ka ghulaam samajhna shaan-e-risaalat ki toheen hogi. Lehaaza riwaayaat aur aql-o-khirad ka yahi faisla hai ki mazkoora hadees main ‘mola’ se
muraad Imam aur qa’ed aur rahbar hain.
Imamat (Part Three)
Lesson Thirteen
Q1. Quran-e-Majeed ki kitni aayaton main Imamat ka tazkira mojood hai?
Ans. Garche quran-e-majeed main be-shumaar aayatain mukhtalif zaawiyon se Imam aur Imamat ke faza’el-o-manaqib bayan kar rahi hain lekin un main se chand aayatain jo Imamat ke mozoo’ main bohot wazeh aur sareeh hain, aur jin ki tareekh ka mutale’ah karne ke baad maaloom hota hai ki yeh Hazrat Ali (a.s) ki Imamat se muta’alliq hain. Zail main wo aayatain qabil-e-mulaheza hain:
1. Aayat-e-Balligh: (Sura’ey Ma’eda, aayat/ 67)
“ Yaa ayyohar rasoolo balligh maa unzela ilaika min rabbeka, wa in lam taf’al famaa ballaghta risaalatho, wallaho yaa’semoka minan naas, innallaha laa yahdi qomaz zaalemeen”
“aiy rasool pohncha dige us paighaam ko jo Allah nain aap naazil kiya hai, aur agar yeh kaam na kiya to goya ko’ee kaar-e-risaalat hi anjaam na diya, aur Allah aap ko logon ke shar se mahfooz rakhe, aur be-shak Allah zaalimon ki hidayat nahi karega.”
2. Imamat-e-Hazrat-e-Ibraheem: (Sura’ey Baqarah, aayat/164)
“wa izibtala Ibraheema rabbahoo be-kalemaatin, fa-atamma hunna, Qaala inni jaa’eloka linnase Imama, Qaala wamin zurriyati, Qaala laa-yanalo ahdiz Zaalemeen ”
‘jab imtehaan liya Ibraheem ka unke rab nain, mukhtalif zariyon se, aur unhon nain sab par kaamyaabi hasil ki to (Allah unse nain) kaha: be-shak main tumhain logon ka Imam bana raha hoon, (Janab-e-Ibraheem) boley (khudaya) meri zurriyat main bhi (Imam bana) (Allah nain) kaha: mera ohda zaalimon ko nahi mileyga’
Is aayat se do aham baatain samajh main aati hain:
I. Imamat Allah ki taraf se mil sakti hai.
II. Zaalim aur badkaar ko Imamat nahi mil sakti.
3. Aayat-e-Itaa’at-e-Ulil Amr: (Sura’eh Nisaa/59)
“Yaa Ayyohal Lazeena Aamanoo, Atee’ullaha wa Atee’ur-Rasoola, wa ulil-amrey minkum”
‘ Aiy iman laane waalon ita’at karo, Allah ki aur ita’at kar Rasool ki aur tummain se sahebaan-e-amr ki’
4. Aayat-e-Wilaayat: Sura’eh/Ma’eda/55)
“Innamaa Waliyyo-kullaho, wa Rasoolohoo, wal Lazeena aamanul lazeena yoqeemoonas Salaata, wa yo’toonaz zakata wa hum raake-oon”
‘Aiy iman laane waalon, sirf tumahara wali Allah hai, uske Rasool hain aur wo log hain jo Iman, namaz qayam karte hain aur sajde ki haalat main zakat dete hain’
Tamam mofassereen-e-quran aur mowarrekheen ka ittefaaq hain is baat par ke is aayat ke tanha misdaaq Hazrat Ali hain aur unse pahle aur unke baad ko’ee bhi is aayat ka misdaaq na-bana. Jis se saaf wazeh hota hain ki Rasool ke baad wilaayat ka haq sirf Hazrat Ali ka hai aur unka hai ke Khuda aur Rasool apna jaanasheen bana’ainge.
Q2. Ahadees main Imamat ke silsile main kiya warid howa hai?
Ans. Beshumar hadeesain hain jin main rasool ke baad Hazrat Ali aur digar A’imma ki imamat ka naam ba naam mojood hai, jaise:
1. Hadees-e-Ghadeer.
2. Hadees-e-Manzilat.
3. Hadees-e-Yomuddar.
4. Hadees-e-Saqlain.
5. Hadees-e-Safina.
6. Isna-Ashar Imamon ki Riwaayaat.
Q3. Kiya Hadees main Imamon ke naam zikr howe hain?
Ans. Yaqeenan, Rasool-e-Khuda se muta’addid Hadeesain manqool hain jin main Aap ne Imamon ke naam bayaan farma’ey hain, chunaanche namooney ke tor aik qaabil-e-mulaheza hai:
Rasool-e-Khuda ke paas aik Na’sal naam ka yahoodi shakhs aakar poochta hai ki:
Aap apne baad apne jaansheenon ke naam bata’ain, Rasool-e-Khuda nain yaka-yak Hazrat Ali (a.s) se lekar Imam Mehdi (a.s) tak tamam Imamon ke naam bayaan farmaa’ey.
Q4. Aakhri Imam ka Zohoor ho chuka hai ya hoga?
Ans. Rasool-e-Khuda aur digar A’imma ki Hadeeson ke mutabiq Aakhri Imam ka Zohor aakhri zamaane main hoga aur zameen ke zul-o-jor se labraiz hogaane ke baad, zameen ko adl-o-insaaf se pur kar dainge. Aur agar dunya ke khatm hone ko aik din bhi baaqi rahega to Khuda us din ko itna toolaani kardege ke zameen par adl-o-insaaf qayam ho jaye.
Lehaaza Aakhri Imam ka zohoor Hukm-e-Khuda ka muntazir hai aur jab khuda ki maslahat hogi khuda unka zohoor kardega.
Q5. Aakhri Imam ka zohoor kiyon zaroori hai?
Ans. Allah ke adl-o-insaaf ka taqaaza yeh hai ke dunya main zaalim ko kaifar-e-kaar tak pohnchaa’ey aur mazloom ko uska haq dila’ey. Lekin dekha yeh jaata hai ki aksar zaalim, apne zulm-o-jor par sabit qadam hain, aur mazlom unke ghair insaani ahdaaf ka shikaar ban rahe hain.Jab ki insaani fitrat zulm ke khatme ka intezaar mojood hai. Aur yeh fitri intezaar us waqt tak apni amali taa’beer ko nahi paa sakta jab tak ko’ee masiha aur mazloomon ka mudafe’ aur unka himayati ho aur unhain zulm-o-sitam se nijaat dila’ey aur zaalimon ko kaifar-e-kaar tak pohnchaa’ey. Allah nain is fitri taqaaze taskeen aur mazloomon ki himayat ke liye aakhri zamaane mai jab zameen zulm-o-sitam se labrez hoja’eygi aur har taraf na-insaafi aur haqtalfi aur mazloomon ki sarkobi apne aoj-o-orooj ko pohonch jaa’eygi to Khuda ki janib se aik masihe ka zohoor hoga jo zulm-o-sitam se bhari dunya ko adl-o-insaaf se pur kar dega, aur tamam haqdaaron ko unka haq dila’eyga. Islam main is masihe ka naam ‘Mehdi’ hai. Baghair is masihe ke zohoor ke Allah ka maqasd-e-Takhleeq poora nahi ho paa’eyga. Lehaaza aakhri Imam ka zohoor zaroori hai.
Q6. Kiya Quran main aakhri Imam ke zohoor ka tazkira mojood hai?
Ans. Yaqeenan mojood, chunaanche sura-e-noor ki pachpanween (55) aayat main irshaad hota hai:
“wa’adallahul Lazeena Aamanoo wa amelus-saalehaate, la-yastakhle-fannahum fil arze, kamas takhlafal Lazeena min qable him”
‘khuda nain wa’da kiya hai ki wo un logon ko jo Iman la’ey aur aa’maal-e-saleh anjam diya, unhain zameen par khaleefa bana’eyga, jis tarha usney unsey pahle bhi logon ko (zameen) par khaleefa banaya hai’.
Aur isi aayat main aage aayaa hai:
“wa layumakkenanna lahum deena-humul lazeer taza lahum, wa layobaddelannahum mim baa’de khofe-him amnan, yaa’bodoonanee walaa yushrekoona bee shai-an”
‘ aur unke ikhteyaar main qaraar dega us deen ko, jise usey unke liye pasand kiya hai, aur ukey khof ko amn main badal dega, wo meri (Allah ki) ibaadat karainge aur kisi ko mera shareek qaraar nahi dainge’
Chothe Imam farmaate hain:
“ Hum wallahi shii’atona, yaf’alullaho Zaaleka behim alaa yadai rajolim minna, wa howa Mahdeeyo haazehil ummah”
Is aayat aur mazkoora hadees se saaf wazeh hota hai ki aakhri zamaane main Imam Mehdi ka zohoor hoga aur wo zameen ko adl-o-insaaf se pur kardega.
Q7. Kiya hadeeson main aakhri Imam ke zohoor ka tazkera hai?
Ans. Haan, aisi be-shomaar hadeesain hain jin main, Imam Mehdi ke zohoor ka tazkera mojood hai, jis ki aik nazeer chothe Imam ki mazkoora hadees hai. Is tarha ki aur bhi hadeesain mojood hain. Chunaanche paighambar-e-Islam farmaate hain:
“Lo lam yabqa minad dahre illa yomun latawwalallaho zaalekal yom hatta yab’asa rajolan min ahlebaiti yamla’oha qistan wa adlan, kama mole’at zulman wa joran”
‘ Agar dunya ke khaateme ko aik din bhi bach jaa’eyga to khuda us din ko itna toolaani banadega, yahan tak ke mere ahlebait main se aik mard mab’oos hoga, jo zameen ko adl-o-insaaf se bhar dega, jis tarha wo zulm-o-jor se bhari ho’ee hogi’
Isi tarha ki aik hadees Imam-e-Sadiq (a.s) se bhi marwi hai jis main Aap nain Mehdi-e-qaayam ke zohoor ka tazkira kiya hai.
Q8. Imam-e-Zamana ki ghaibat main deen ki mehaar kiske hawaale hogi?
Ans. Imam-e-Zamana kaa bhi digar Imamon ki tarha fariza logon ke darmiyaan hokumat aur unki qayadat karna hai, lekin jab Allah nain maslahat ke sabab unhain Ghaibat di to unki ghaibat main bhi ko’ee aisa ho jo Islami aur insaani mo’aashere ki ilaahi qayadat kare, take Islami mo’aashera baghair qaa’ed aur rahbar ke na-rahe. Is zaroorat ke pesh-e-Nazar Imam-e-zamaana nain apni ghaibat-e-kubra ke waqt irshaad farmaaya:
“Mun Kaana minal foqahaa’ey, saa’enan le-nafsehi, Mohafezan le-deeneh, Mokhaalefan le-hawaho, Motee’an le-amr-e-molaho, Fa-lil-awaame an yoqalledooho”
‘(Tum main se) Jo bhi faqeeh, apne nafs ko (gunaahon se) bachata ho, apne deen ka mohaafiz ho, apne khaaheshaat ka mokhaalif ho, aur apne mola ka farmaa-bardaar ho, to awaam par lazim hai ke unki taqleed aur pairawee karain'
Chunaanche Imam nain apni ghaibat main jaame-ush-shara’et , foqaha Imam ki janib se logon ki qayadat ki baad dor sambhalainge.
